Kris Aquino ‘ultimate plot twist’ sa buhay ni Fonz: Ang swerte-swerte!
ITINUTURING ng aktor at content creator na si Fonz bilang bonggang blessing sa kanyang life ang nag-iisang Queen of All Media na si Kris Aquino.
Binalikan ni Fonz o Aldrich Nartia sa tunay na buhay kung paano binago ni Kris ang takbo ng buhay niya noong wala siyang kapera-pera at walang pinagkakaabalahang trabaho.
Sa guesting niya sa latest episode ng “Your Honor” vodcast na may titulong “In Aid of Plot Twists: Mina-manifest Ba?”, naikuwento ng “Apoy sa Dugo” star kung paano naging bahagi ng tagumpay niya si Kris.
“Siguro isa sa pinaka-ultimate na plot twist is ‘yung napasok nga ako kay Madam Kris Aquino.
“Na-share ko ito before, kasi ito ‘yung time na as in wala akong kapera-pera, wala akong katraba-trabaho.
“Perfect example ito, kasi nag-a-apply ako ng trabaho sa Singapore, so, ‘yun ang goal ko, ‘di ba? Makapagtrabaho sa Singapore na barista.
“Yung tumutulong sa akin du’n ghinost ako, as in ito na ‘yung papel ganu’n, ready na ako. Sabi ko ‘asan na? asan na?’” pagbabahagi ng vlogger.
Tanong ng host na si Chariz Solomon, “Biglang hindi na nagre-reply? Na-scam ka?” Sagot ni Fonz, “Slight.” Wala naman daw nakuhang pera sa kanya.
Pagpapatuloy niya, “Nagtrabaho na ako nang konti sa coffee shop niya sa Singapore. Umuwi kami para asikasuhin ‘yung papeles. Sabi niya, ‘babayaran kita sa trinabaho mo du’n pagbalik natin.’
“Nu’ng pabalik na kami, hindi na siya nagparamdam. So, parang nalungkot lang ako kasi ito ‘yung inaasahan ko at alam na ng mga kaibigan ko na magtatrabaho ako sa Singapore,” saad pa niya.
Hanggang sa gumawa nga siya ng meme tungkol sa isang fake job interview kung saan ginamit niya ang isang video clip ni Kris.
Patuloy ni Fonz, “Tapos bored ako nu’n, ginawan ko ng meme si Madam Kris, tapos nag-viral sa Facebook.
“Nakita niya, minessage niya ako, tapos in-offer-an niya ako ng trabaho. ‘Yung parang ‘ito ‘yung goal mo, ‘di ba?’ Sobrang gumanu’n (nagmuwestra ng pag-ikot ng kamay).
“As in nagtatatalon talaga ako, kaya siya plot twist kasi imagine, talagang ako ‘yung probinsyano na sobrang hilig sa mga artista, tapos ‘yung magko-comment sa ‘yo ‘yung number one na artista,” sey pa ni Fonz.
“Eventually, umabot din ako sa pagiging Junior Producer ‘yung tawag, sa mga vlogs niya before,” sey pa ni Fonz na umabot din ng halos three years sa pagtatrabaho kay Kris.
Aniya pa, “Best job, apart from being a content creator and pagiging artista.”
Dagdag hirit pa niya, “Nakakatuwa lang. Nu’ng umalis na ako kay Madam, doon ko na-realize na grabe pala sa production namin, ang swerte-swerte namin.”
